Pasodoble Maziello

D'o disco "M´en baxé ta tierra plana", creyo recordar que estió o terzer, publicau en o 1994, ye o mesmo disco an se podió escuitar canta nabatera "Zinca Traidora", as bozes nabateras estioron:: Luis Pallaruelo (Luisón), José Pallaruelo (Pepe), José Cosculluela (Raso), Andrés García (Andresón), Joaquín Garcés (Quinón), Santiago Giral (Santiagué d’A Buerda), Juan Carlos Crespo (Crespillo), Rafael Ara (Merodio) y José Antonio Murillo (Cabezón)

PASODOBLE MAZIELLO 

  (La Orquestina del Fabirol)

Parola: Roberto Serrano. Mosica: Javier Ferrández/Roberto Serrano

I hai un ombre más duro que un cantal

que por difuera tiene piel d’esmoladera,

pero cuan dengún se’l mira bei “Cristal”

y mesmo a solas le da bela ploradera.

Qué se’n saben por qué no podría cuallar,

cadagún s’alcuerda d’aquela mozeta

que fa uns años ya se ban dixar estar,

anque digan en o bar “as mullers… problemas”.

Istos ombres son beta de la millor,

son en todas as verbenas y borinas,

con lo bien que resacan o chabalín,

qué difízil ye ulorar una chabalina!

Si una pieza les fa ta o mundo tornar

ye un pasodoble bailau mui fito fito,

si ella no esbulliga y s’han puesto apretar,

bien puestar que s’animen con o Cachito.

Maziello, tu yes o sentir

d’o puro esprito d’a montaña,

maziello, no gosas tartir

cuan te dizen: “a ixa da-le caña”.

Periglo, s’amanan mullers

te las miras con güellos d’angluzia,

debanta ixe codo d’a barra,

puya más entalto a güellada

y quita ixa moza a bailar.

O fenomeno de no fer familia fa

tremolar toz os alazez –diz o Papa–,

si ixa pasa s’estendilla encara más

por ista soziedá ni dios da la cara.

Como os tiempos desixen d’adautazions

a las nuebas ruxiadas filosoficas,

o maziellamen troba chustificazión

ta la suya solenca enchaquia de bida.

Diz que en Zaragoza por solidaridá

de chen que no prezisa de carabanas,

s’ha creyau crica de “Maziellos buquidors”

ta adaptar-se a la reyalidá urbana.

Atros dizen que ye un opzión presonal,

que son como os santers d’antes pero libres,

pero maziello, simple u intelectual,

siempre dirá a la fin de cualsiquier baile:

–Joder, quí les manda callar,

qué pasa con istos mosicos,

si no fan que atra pieza más

a ixa roya ista nuet me la ligo,

ya la tenebe bien rusién,

ez parau cuenta que se me miraba,

pero si l’ese dito “bailas?”

ya no me la saco de casa

y dimpués ya me puez contar…

Asinas soi bien, istos no son lugars ta mullers.

Maziello, tu yes o sentir

d’o puro esprito d’a montaña,

maziello, no gosas tartir

cuan te dizen: “a ixa da-le caña”.

Periglo, s’amanan mullers

te las miras con güellos d’angluzia,

debanta ixe codo d’a barra,

puya más entalto a güellada

y quita ixa moza a bailar.