Belsierre

Feba diyas que no puyaba ta Belsierre y iste cabo de semana pasato m’en fui a fer una chiradeta por o lugar.

Belsierre contina estando un lugar con o mesmo encanto de siempre y ixo que i an fecho muitas casas de nuebo en a parte baixa que son de "Turismo rural", pero que son bien politas y respeutando a construzion montañesa. Torne ta casa con un buen gusto de boca y goyoso con o treballo que son fiendo en o lugar y antimas ista chiradeta ta o lugar bezin fizo que m'alcuerdase de "Pepe de Belsierre",da suya moto y d'as istorias que nos contaba en o mentidero de cuan estio treballando en a Guinea.

Dende aquí ta baixo o escrito ye en l'aragonés d'a balle de Puértolas.

Belsierre  ye un lugar d'o municipio de Puértolas (Uesca), en l'aria central d'o Sobrarbe. A población suya ye de 22 habitants (2005). Belsierre ye uno d'os tres lugar d'a parte baixa d'a balle de Puértolas, en chunto con Escalona y Puyarruego. .

Belsierre se troba en a mesma garra larga d'o Castiello Mayor que baixa ta Escalona, prelongata quantos kilometros en fendo una costera larguiza que per alto tiene os lugars de Puértolas y Santa María, pero 5 km debaixo d'estes. O casar antiguo de Belsierre feba una baixant d'o repuntot a on ye posentato, con a ilesia en l'alto de tot, pero como en a Guerra el habioron de reconstruir dimpués que el destruisen as tropas, se tornó a devantar en o recuesto que ye a on se troba actualment.

Belsierre estió uno d'os pocos lugars d'o Sobrarbe que s'adubioron a destruyir de tot en a Guerra Civil. Dimpuesas que os nacionals encalcesen a tropa republicana a finals de marzo de l'anyo 38 (en os campos d'entre A Buerda y Escalona que cruzoron os primers tiros) tronzando-les a escapatoria, o primer movimiento defensivo d'a 43 División Republicana que fayoron estió de, viyendo que es Nacionals les superaban en numero, enrocar-se entre Puyarruego y Belsierre, en o primer recosiello d'el que luego habría d'estar a Bolsa de Bielsa.

En ixes diyas, as tropas d'a 3ª companyía de Navarra (Exercito d'es Nacionals) s'ensentioron en Escalona, mientres que a mes gran parte de l'exercito suyo iba adubindo o control d'as villas mes prencipals d'a Ribagorza. Ixa situación d'amagatos a os republicanos les duró bien poco, pos poquetz días mes tarde y preveyendo que s'heban de fer buens estroces, a semana d'o 6 dica o 13 d'abril pactoron d'evaquar os habitants (bells 5000, en as valles de Puértolas, a Espuña,Tella, Bielsa y Chistau) y fer-los pasar o Puerto Biello ta Francia.

O lugar el bombardeyoron 2 veces en o transcurso d'a contienda, la una con artillería de tierra y la segunda con avions. A primer vez el bombardeyoron ta privar que se bi amagasen os republicanos adintro, y la segunda, perque sospechaban os nacionals que precisando como precisaban os republicanos bell puesto a on poder fer aterrizar os avions,”o plano de Belsierre” sería o millor puesto ta tener-ie un aerodromo, y per ixo el mandoron bombardeyar con l'aviación.

De resultas d'ixo, només en quedoron que dos casas en piet. A resta las habioron de reconstruyir os belserrinos quan tornoron d'o exilio. A ilesia biella, en alto d'o casar, ye a zaguer resta d'aquello.