Un real y un duro de plata.

De tornas ta Sobrarbe os nabateros eban cogiu o tren ta Monzón. y con ers eba puyau un terrateniente da tierra baixa. Iste pensando que yeran tozasziegas y el o mas espabilau le propuso un trato a o mas biello de toz.

Yo le fare una pregunta y si no l'endibina abra de dame un real, dimpues me fa a pregunta a yo y si no l'endibino abre de dale un duro de plata.

O nabatero teneba ganas de chitase y fer una clucada mientras feban o biache, pero como l'atri se feba cansino y no paraba d'insistir, ubo de fer trato.

O mesache le fa a primera pregunta a o nabatero,¿ Cuantos trampos de nabata farian falta pa fer un puente dende a tierra dica a luna?.

O nabatero fica a mano en a pocha sin pensaselo y le da o real. Con muita tranquilida quita o brocal da bota ,fa un buen trago, se pasa o moquero por a boca y dimpues le pregunta a o terrateniente, ¿Que ye o que puya ta montaña con tres garras y torna con cuatro?. Se rechita en l'asiento y se pone a dar una clucada.

O mesache da tierra baixa empezipia a dale bueltas a o tozuelo pensando que bien de seguro yera una pregunta con segundas, y asinas rondinando rondinando deixa pasar cuasi una ora y cuando bei que o nabatero se dispierta le dizio " ¡¡Toma o duro de plata!! y agora quies dezime ¿Que ye o que puya ta montaña con tres garras y torna con cuatro?".

O nabatero le da o duro de plata a uno d'os nabateros mas choben y bien plantau "guardalo pa brendar en Monzon, le dizio cucandole o güello" y chirandose t'ande o terrateniente se fica a mano en a pocha le da otro real y le dizio,"O real te las ganau, yo tampoco lo se ,o trato ya ye rematau y si quies mas esplicazions l'en pides a ixe que lleba a estral en l'ombro y o duro de plata en a pocha".