Tresbalse (Aragones)

TA demanda á o Gubierno d´Aragón que refuse o trescole de l´Ebro y l´insta á que comboque á toda la soziedat aragonesa á mobilizar-se y contrimostrar a suya oposizión d’una traza zebica y democratica.
Atra begata nos trobamos terne que terne con un tresbalse que pencha por denzima d’Aragón como espada de Damocles.
Si ya la primer postura d’o Gubierno aragonés la podérbanos calificar de tibia en condizionar o refirme á que se guaranziase a furnidura á 70 monezipios aragoneses con muitos problemas d’abasteximiento, u sin ellos, o desproposito d’o Gubierno central de no responder á la proposa aragonesa, contrimuestra que, en istos temas, a negoziazión con espanya ha de fer-se dende posizions d’igualdat. Una begata más, a esperienzia dixa platero que nomás queda contestar á l’echecutibo espanyol con a mobilizazión sozial como unica traza de contrimostrar a nuestra más firme oposizión y refús á ista nueba agresión que se fa á Aragón.
Ísta ye ya la segunda prebatina de trescole de l’Ebro que s’ordena dende o gubierno zentral. L’anterior fuo suspendita por as intensas plebias, con o que quedó contrimostrato que no en yera reyalment nesezario. Por iste motibo metemos seriosament en duda que ista begata tamién lo en siga, más que más porque no s’han enchegato en as redolatas demandants as midas nesezarias d’aforro en consumo d’augua y de priorizazión d’o suyo emplego ta o suyo consumo y d’atros emplegos, que poderban fer que iste tresbalse no calese.
Consideramos que a irresponsable autitut d’Iglesias y Biel responde á intreses de partito, sin remerar-sen de que, antis que a suya melitanzia politica, o suyo deber ye con os ziudadans aragoneses y con os suyos botants. A ideya d’esfensa d’Aragón con os feitos, dillá d’a bueda monita politica, ye cualcosa que li manca á iste equipo de gubierno, o que resalta la suya manca de capabilidat ta liderar iste país.
TA proposa que o Gubierno d’Aragón busque un amplo refirme parlamentario ta oposar-se á iste tresbalse idrico y, de conchunta con os achents sozials, comboque á la soziedat aragonesa á partizipar-ie masibament y mobilizar-se en contras d’o tresbalse, entremistanto que as condizions que metió a D.CH.A en primerías no sigan adempribiatas por l’echecutibo espanyol. No ye ya una custión de solidaridat con os monezipios catalans que han demandato iste trescolese, ye una custión de reziprozidat con Aragón, en os criterios de solidaridat con os que se trata á os aragoneses dende Madrid.